ಶಿವಮೊಗ್ಗ: ಜೆಸಿಐ ಶಿವಮೊಗ್ಗ ಅನಿಕೇತನದಿಂದ ಸೆ. 9ರಿಂದ 15ರವರೆಗೆ ವೈವಿಧ್ಯಮಯ ‘ಜೆಸಿಐ ಸಪ್ತಾಹ’

ಶಿವಮೊಗ್ಗ, ಸೆ.07: ನಗರದ ಪತ್ರಿಕಾ ಭವನದಲ್ಲಿ ಸೋಮವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಈ ಕುರಿತು ಮಾಹಿತಿ ನೀಡಿದ ಜೆಸಿಐ ಶಿವಮೊಗ್ಗ ಅನಿಕೇತನ ಘಟಕದ ಅಧ್ಯಕ್ಷ ಎಂ. ಸಂದೇಶ್, ಸಪ್ತಾಹದ ಅಂಗವಾಗಿ ಪ್ರತಿದಿನ ಸಾರ್ವಜನಿಕರಿಗೆ ವಿವಿಧ ವಿಷಯಗಳ ಕುರಿತು ಅರಿವು ಮೂಡಿಸುವ ಹಾಗೂ ಅವರನ್ನು ಒಳಗೊಳ್ಳುವ ವಿಶೇಷ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ ಎಂದು ತಿಳಿಸಿದರು.

ಸಪ್ತಾಹದ ದಿನನಿತ್ಯದ ಕಾರ್ಯಕ್ರಮಗಳ ವಿವರ:

• ಸೆ. 09 (ಪ್ಲಾಸ್ಟಿಕ್ ಮುಕ್ತ ಜಾಗೃತಿ): ‘ಸಸ್ಟೇನಬಲ್ ಸಿಪ್ಪಿಂಗ್’ ಕಾರ್ಯಕ್ರಮದ ಮೂಲಕ ಪ್ಲಾಸ್ಟಿಕ್ ಬಾಟಲ್ ಬಳಕೆಯಿಂದಾಗುವ ದುಷ್ಪರಿಣಾಮಗಳ ಕುರಿತು ಜಾಗೃತಿ ಮೂಡಿಸಲಾಗುವುದು. ಆಟೋ ಚಾಲಕರು ಹಾಗೂ ಬೀದಿಬದಿ ವ್ಯಾಪಾರಿಗಳಿಗೆ ಸ್ಟೀಲ್ ಬಾಟಲ್ ವಿತರಿಸಿ, ಪ್ಲಾಸ್ಟಿಕ್ ಬಳಕೆ ತಗ್ಗಿಸುವಂತೆ ಮನವಿ ಮಾಡಲಾಗುವುದು.
• ಸೆ. 11 (ಮಾನವ ಕರ್ತವ್ಯ ಮತ್ತು ಡಿಜಿಟಲ್ ದಿನ): ‘ಹ್ಯೂಮನ್ ಡ್ಯೂಟೀಸ್ ಆ್ಯಂಡ್ ಡಿಜಿಟಲ್ ಔಟ್‌ರೀಚ್ ಡೇ’ ಅಂಗವಾಗಿ ಮಾನವ ಕರ್ತವ್ಯಗಳ ಕುರಿತು ಸಾರ್ವಜನಿಕರಲ್ಲಿ ಜಾಗೃತಿ ಹಾಗೂ ವಿಶೇಷ ಸಹಿ ಸಂಗ್ರಹ ಅಭಿಯಾನ ನಡೆಯಲಿದೆ.
• ಸೆ. 12 (ವ್ಯಾಪಾರ ಮತ್ತು ನೆಟ್‌ವರ್ಕ್ ವೃದ್ಧಿ): ‘ಬಿಸಿನೆಸ್ ಆ್ಯಂಡ್ ನೆಟ್‌ವರ್ಕ್ ಗ್ರೋತ್ ಡೇ’ ಆಚರಿಸಲಾಗುತ್ತಿದ್ದು, ಆರ್ಥಿಕ ಅರಿವು ಹಾಗೂ ವ್ಯವಹಾರ ಕೌಶಲ ಬೆಳೆಸುವ ನಿಟ್ಟಿನಲ್ಲಿ ಜೆಸಿಐ ಆರಂಭಿಸಿರುವ ‘ಜೇಸೀಸ್ ಚೇಂಬರ್ ಆಫ್ ಕಾಮರ್ಸ್’ (JCOM) ಸಭೆಗಳು ಹಾಗೂ ಚಟುವಟಿಕೆಗಳ ಕುರಿತು ಅರಿವು ಮೂಡಿಸಲಾಗುವುದು.
• ಸೆ. 13 (ಸದಸ್ಯತ್ವ ವಿಸ್ತರಣೆ): ‘ಮೆಂಬರ್‌ಶಿಪ್ ಎಕ್ಸ್‌ಟೆನ್ಷನ್ ಡೇ’ ಅಂಗವಾಗಿ ಜೆಸಿಐ ಸೇರಲು ಆಸಕ್ತಿ ಹೊಂದಿರುವ ಯುವಜನರನ್ನು ಗುರುತಿಸಿ, ಸಂಸ್ಥೆಗೆ ಅಧಿಕೃತವಾಗಿ ಆಹ್ವಾನಿಸಲಾಗುವುದು.
• ಸೆ. 14 (ಕುಟುಂಬ ಸಮಾವೇಶ): ‘ಫ್ಯಾಮಿಲಿ ಬಾಂಡಿಂಗ್ ಡೇ’ ಅಂಗವಾಗಿ ಸಂಸ್ಥೆಯ ಸದಸ್ಯರು ಕುಟುಂಬ ಸಮೇತರಾಗಿ ಒಂದೆಡೆ ಸೇರಿ ಗಣೇಶೋತ್ಸವವನ್ನು ವಿಶೇಷವಾಗಿ ಆಚರಿಸಲಿದ್ದಾರೆ.
• ಸೆ. 15 (ಸಾಧಕರಿಗೆ ಸನ್ಮಾನ): ಸಪ್ತಾಹದ ಕೊನೆಯ ದಿನದಂದು ಸಮಾಜದ ವಿವಿಧ ಕ್ಷೇತ್ರಗಳಲ್ಲಿ ಎಲೆಮರೆ ಕಾಯಿಯಂತೆ ನಿಸ್ವಾರ್ಥ ಸೇವೆ ಸಲ್ಲಿಸುತ್ತಿರುವ ಸಾಧಕರನ್ನು ಗುರುತಿಸಿ ಸನ್ಮಾನಿಸಲಾಗುವುದು.

ಸೆ. 10ರಂದು ಬೃಹತ್ ಭಾಷಣ ಸ್ಪರ್ಧೆ:

ಸೆಪ್ಟೆಂಬರ್ 10ರಂದು ‘ಯೂತ್ ಲೀಡರ್‌ಶಿಪ್ ಡೇ–ವಾಯ್ಸ್ ಆಫ್ ಯೂತ್’ ಅಂಗವಾಗಿ ನಗರದ ವಿವಿಧ ಕಾಲೇಜುಗಳಲ್ಲಿ ಭಾಷಣ ಸ್ಪರ್ಧೆ ಆಯೋಜಿಸಲಾಗಿದೆ. ‘ಪಾಥ್‌ವೇಸ್ ಸಹಯೋಗ’ದೊಂದಿಗೆ ಮಹಿಳಾ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಸೇರಿದಂತೆ ಪ್ರಮುಖ ಕಾಲೇಜುಗಳಲ್ಲಿ ಸ್ಪರ್ಧೆ ನಡೆಯಲಿದ್ದು, ಸುಮಾರು 1,000 ವಿದ್ಯಾರ್ಥಿಗಳನ್ನು ತಲುಪುವ ಗುರಿ ಹೊಂದಲಾಗಿದೆ. ಭಾಗವಹಿಸುವ ಪ್ರತಿಯೊಬ್ಬರಿಗೂ ಪ್ರಮಾಣಪತ್ರ ನೀಡಲಾಗುವುದು ಎಂದು ಎಂ. ಸಂದೇಶ್ ವಿವರ ನೀಡಿದರು.

ಜೆಸಿಐ ಸಂಸ್ಥೆಯನ್ನು ಸೇರಲು ಇಚ್ಛಿಸುವ ಯುವಜನರು 72596 20234 ಸಂಖ್ಯೆಯನ್ನು ಸಂಪರ್ಕಿಸಬಹುದಾಗಿದೆ. ಸುದ್ದಿಗೋಷ್ಠಿಯಲ್ಲಿ ವಲಯ ಉಪಾಧ್ಯಕ್ಷ ಗಣೇಶ್ ಪೈ, ವಲಯ ನಿರ್ದೇಶಕ ಪ್ರಮೋದ್ ಶಾಸ್ತ್ರಿ, ಖಜಾಂಚಿ ನಿಧಿ, ಹಾಗೂ ಸದಸ್ಯರಾದ ಹೊನ್ನಾಳಿ ಚಂದ್ರಶೇಖರ್ ಮತ್ತು ಪ್ರದೀಪ್ ಉಪಸ್ಥಿತರಿದ್ದರು.