ಶಿವಮೊಗ್ಗ: ಓಲಾ ಎಲೆಕ್ಟ್ರಿಕ್ ವಾಹನಗಳ ಸರ್ವಿಸ್‌ಗೆ ಪರದಾಟ; “ಇಂದು ಬನ್ನಿ, ನಾಳೆ ಬನ್ನಿ” ಎಂದು ಅಲೆದಾಡಿಸುತ್ತಿರುವ ಶೋರೂಮ್‌ ಸಿಬ್ಬಂದಿ!

ಶಿವಮೊಗ್ಗ : Ai-ವಾರ್ತಾ, ಅಕ್ಟೋಬರ್ 1

ಎಲೆಕ್ಟ್ರಿಕ್ ವಾಹನ ಖರೀದಿಸಿ ಪೆಟ್ರೋಲ್ ವೆಚ್ಚ ಉಳಿಸೋಣ ಅಂದುಕೊಂಡಿದ್ದ ಗ್ರಾಹಕರಿಗೆ ಓಲಾ ಸಂಸ್ಥೆಯ ನೆಪಗಳು ಮತ್ತು ಕಳಪೆ ಸರ್ವಿಸ್ ಸೇವೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ. ಶಿವಮೊಗ್ಗ ನಗರದ ಓಲಾ ಎಲೆಕ್ಟ್ರಿಕ್ ವಾಹನ ಶೋರೂಮ್‌ಗಳಲ್ಲಿ ಸೂಕ್ತ ಸಮಯಕ್ಕೆ ಸರ್ವಿಸ್ ದೊರೆಯದೆ ನೂರಾರು ಗ್ರಾಹಕರು ಪ್ರತಿದಿನ ಪರದಾಡುತ್ತಿರುವ ಗಂಭೀರ ಆರೋಪ ಕೇಳಿಬಂದಿದೆ.

ಶಿವಮೊಗ್ಗ ತಾಲೂಕು ಹೊಳಲೂರು ಹೋಬಳಿ ಸೂಗೂರು ಪೋಸ್ಟ್‌ನ ಕೆ.ಎಸ್. ಕುಮಾರ್ ಎಂಬುವವರು ತಮ್ಮ ಮಗ ಕೆ. ಅಭಿಷೇಕ್ ಅವರಿಗಾಗಿ ಬೆಕ್ಕಿನ ಕಲ್ಮಠದ ಸಮೀಪವಿರುವ ಓಲಾ ಶೋರೂಮ್‌ನಲ್ಲಿ ಎಲೆಕ್ಟ್ರಿಕ್ ಸ್ಕೂಟರ್ ಖರೀದಿಸಿದ್ದರು. ಆದರೆ, ವಾಹನ ಖರೀದಿಸಿದ ಕೆಲವೇ ದಿನಗಳಲ್ಲಿ ಸಣ್ಣಪುಟ್ಟ ತಾಂತ್ರಿಕ ತೊಂದರೆಗಳು ಕಾಣಿಸಿಕೊಂಡಾಗ ಸರ್ವಿಸ್‌ಗಾಗಿ ಶೋರೂಮ್‌ಗೆ ಅಲೆದಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.

“ಇಂದು ಬನ್ನಿ, ನಾಳೆ ಬನ್ನಿ”: ನೂರಕ್ಕೂ ಹೆಚ್ಚು ವಾಹನಗಳು ಧೂಳು ತಿನ್ನುತ್ತಿವೆ! ಶಿವಮೊಗ್ಗ ನಗರದ ಎನ್.ಟಿ. ರಸ್ತೆ ಹಾಗೂ ಬೆಕ್ಕಿನ ಕಲ್ಮಠದ ಬಳಿ ಇರುವ ಎರಡೂ ಓಲಾ ಶೋರೂಮ್‌ಗಳಲ್ಲೂ ಇದೇ ರೀತಿಯ ವಾತಾವರಣವಿದೆ. ಸರ್ವಿಸ್‌ಗಾಗಿ ಹೋದರೆ ಸಿಬ್ಬಂದಿ “ಇಂದು ಬನ್ನಿ, ನಾಳೆ ಬನ್ನಿ” ಎಂದು ಬೇಜವಾಬ್ದಾರಿ ಉತ್ತರ ನೀಡುತ್ತಿದ್ದಾರೆ. ಬೆಕ್ಕಿನ ಕಲ್ಮಠ ಶೋರೂಮ್‌ನ ಸರ್ವಿಸ್ ಸೆಂಟರ್‌ನಲ್ಲಿ ನೂರಕ್ಕೂ ಹೆಚ್ಚು ವಾಹನಗಳು ದಿನಗಟ್ಟಲೆ ಸರ್ವಿಸ್‌ಗಾಗಿ ಕಾಯುತ್ತಾ ನಿಂತಿವೆ ಎಂದು ಗ್ರಾಹಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ವಿತರಣೆಯ ಸಮಯದಲ್ಲಿ ವರ್ಷಗಳ ವಾರಂಟಿ ಹಾಗೂ ಉಚಿತ ಸೇವೆಗಳ ಭರವಸೆ ನೀಡಿದ್ದ ಸಂಸ್ಥೆಯು, ವಾಸ್ತವದಲ್ಲಿ ಗ್ರಾಹಕರ ಕರೆಗಳಿಗೂ ಸರಿಯಾಗಿ ಸ್ಪಂದಿಸುತ್ತಿಲ್ಲ ಎಂದು ಕೆ.ಎಸ್. ಕುಮಾರ್ ಅಸಮಾಧಾನ ತೋಡಿಕೊಂಡಿದ್ದಾರೆ.

ಫ್ರಾಂಚೈಸಿ ಬದಲಾವಣೆ ನೆಪ: 15 ದಿನ ಕಾಯುವಂತೆ ಸೂಚನೆ! ಇತ್ತೀಚೆಗೆ ಈ ಎರಡೂ ಶೋರೂಮ್‌ಗಳ ಫ್ರಾಂಚೈಸಿಯನ್ನು ‘ವಿಜಯ ಮೋಟಾರ್ಸ್’ ಮಾಲೀಕರು ವಹಿಸಿಕೊಂಡಿದ್ದಾರೆ ಎನ್ನಲಾಗಿದ್ದು, ಈ ಬಗ್ಗೆ ವಿಚಾರಿಸಿದರೆ “ಹೊಸ ಫ್ರಾಂಚೈಸಿ ಪೂರ್ಣಪ್ರಮಾಣದಲ್ಲಿ ಕಾರ್ಯಾರಂಭ ಮಾಡಲು 15 ದಿನ ಬೇಕು, ಅಲ್ಲಿಯವರೆಗೆ ಕಾಯಿರಿ” ಎಂದು ಹೇಳಲಾಗುತ್ತಿದೆ. ಆದರೆ ಈಗಾಗಲೇ ವಾಹನವಿಲ್ಲದೆ ದೈನಂದಿನ ಕೆಲಸಗಳಿಗೆ ತೊಂದರೆ ಅನುಭವಿಸುತ್ತಿರುವ ಗ್ರಾಹಕರಿಗೆ ಮತ್ತೆ 15 ದಿನ ಕಾಯುವುದು ಗಾಯದ ಮೇಲೆ ಬಿಸಿ ನೀರು ಚೆಲ್ಲಿದಂತಾಗಿದೆ.

ಶೋರೂಮ್ ಅಥವಾ ಫ್ರಾಂಚೈಸಿ ಬದಲಾವಣೆಯ ಆಂತರಿಕ ಕಾರಣಗಳಿಂದ ಗ್ರಾಹಕರು ಶಿಕ್ಷೆ ಅನುಭವಿಸುವುದು ಎಷ್ಟು ನ್ಯಾಯ? ಮಾರಾಟೋತ್ತರ ಸೇವೆಯನ್ನು ತಕ್ಷಣವೇ ಸರಿಪಡಿಸಿ, ನಿಂತಿರುವ ವಾಹನಗಳನ್ನು ಶೀಘ್ರವೇ ರಿಪೇರಿ ಮಾಡಿಕೊಡಬೇಕು ಎಂದು ಸಂಕಷ್ಟದಲ್ಲಿರುವ ಗ್ರಾಹಕರು ಓಲಾ ಆಡಳಿತ ಮಂಡಳಿಯನ್ನು ಆಗ್ರಹಿಸಿದ್ದಾರೆ.

(ಸಂಕಷ್ಟದಲ್ಲಿರುವ ಗ್ರಾಹಕರ ಸಂಪರ್ಕ:
ಕೆ.ಎಸ್. ಕುಮಾರ್ – 8971189422, ಪ್ರಸನ್ನ – 8495828116)